Zocode
Methamphetaminehi psycho stimulants, thluak leh hriatna tha zâm chawk tho thei damdawi a ni a. Amphetamine- Type Stimulants pakhat a ni a, ruihhlo zingah a ngawl vèi awl ber leh a ngawl veina aţanga tal chhuah leh har ber pawla ngaih a ni.

Meth hi thil chi hrang hrang aţangin an siamchhuak a, chung zinga kan hriat lar ber chu 'Khehpuam' kan tih pseudoephrine aţangin a ni. Methamphetaminehi chiu chi, zûk chi leh hipluh chi leh a eia ei chi te a awm a ni.

Indopui Pahnihna-ah khan a brand name ' Pervitin' angin German sipaite khan an ei ţhin a, tunlaia terrorist lar tak ISIS hote hian an ei ţhin a hriat a ni bawk a. Mizoramah pawh a lar tawh hle a, tunhnai lawkah pawh Meth ţha ber chi 'R 7' an tih man a ni a, man loh engzat tak awm ang maw?

Yaba: Yaba hi caffeine leh Methamphetamineinpawlh a ni a, meth ang tho va hlauhawm a ni. Myanmar, Thailand leh Bangladesh ah a tam hle a. Amum sen, serthlum rawng leh a hring dâng a ni tlangpui a, eiin a thlum deuh va, choccolate ang deuhin a taste a awm ni a hriat a ni.

Mihring thluakah hian hriatna thazâm chi hrang hrang a inzawmkhawma, heng hriatna thazâm (nerve) inkar 'synaptic cleft' an tihah hian neurotransmitters a awm a. Meth hian kan thluaka neurotransmitters hrang hrang zingah dopamine hi a khawih nasa ber a.

Dopamine: Dopamine hi neurotransmitter pakhat, nuam tihna, hlimna, hriatrengna, chhia leh ţha hriatna, thil zir theihna, chakna, phurna leh thathona min neih tirtu a ni a, taksa che vel thununtu a ni bawk a ni.

Kan taksaa Meth a luh hian thluak a thleng a, thluaka dopamine a ti sang ta vak a, hlimna lem (euphoria) leh nuam vawrtawp a thlen a. Lungphu leh thâwk a ti rang a, thisen a ti lûm a, phurna namên lo, chak ber ni a inhriatna, thathona, tisa châkna so sâng tak, mahni inrintawkna, rilru kal dingna etc. a thlen ţhin. Nimahsela a tira nuam tak kha tih nawn leh apiangin a nawmna a nep tial tial a,dose tih sân a ngai ta zel ţhin a. A tawpah phei chuan a nawmna a bo a, taksa erawhin a châk huamhuam thung ta ţhin a ni.

Meth ngawlveiin a nghei chuan meth hnathawh letling chiah a thleng ta ţhin a. Depression, nguaina, chauh ngawih ngawihna, rilru buaina, tharum thawh duhna, thil hmuh sualna leh hriatsualna etc. alo awm a, taksa inthunun thei lovin vun karah rannung vak sup sup ang te'n an hre ţhin. Hlauhna leh manganna nasa tak an nei ţhin a, mahni intihnat duhnate neiin chhia leh ţha hriatna a buai vek thei a ni. Miin a addict tawh chuan thlah duh mah se, a taksa in a mamawh tlat tawh a, tih leh châkna a nasa êm êm a, meth-ah bawk a kir leh ţhin a ni.

Party-naah leh hlimhlawp bâwlnaah te an hman nasat ţhin avangin, 'party drugs' ti a hriat a ni a, a sawhkhawk erawh nasa tak a ni. Meth addict pakhatchuan, "Ka hun zawng zawng te meth ruih nan leh meth ruih tur zawn nan ka hmangral ţhin " a ti a ni. Tin, Meth hian tisa châkna, mipat hmeichhiatna a zuauthuauna a thlen avangin mipat hmeichhiatna aţanga inkaichhawn theih natna a darh phah nasa hle a hriat a ni.

A rei deuh hnuah chuan thluak, lung, thisen zâm, ha, sam etc a khawih a, ţhalai pawh tar ang maiin an lo awm tawh ţhin. Thluak hnathawh a tibuai vek a, mi âang maiin an awm a, thil hriatreng theihna a bo va, taksa chêt dân an thunun theih loh avangin maksak deuh deuhin an awm ţhin a. Taksa rihna a tlahniam a, sam a tlakawlh a, ka chhung a hrisel loh avangin hahni a puam a, ha a ngêt chhe vek ţhin. Thisen zâmleh lung a khawih nasa a, vun a khawro a, a pân a, lungphu a mumal lo va, stroke te neiin lungphu a chawl mai ţhin a ni.

Meth ngai te (addict) hi a enkawlna damdawi a awmhran lo va, harsatna an tawh dan a zira enkawl (symptomatic treatment) a ni mai a. Psychotherapy hmanga enkawl a ţangkai ber mai awm e.

Miin Meth a tih vaih chuan a vawikhat tihna aţangin Meth hian a hringnun a tichhe nghal dawn a. A hlauhawm zia ngaihtuah lova a nawmzia ringawt ngaihtuahna avangin miin Meth ngawlveiin a nun a tichhe ţhin a. Meth ti lo tura inzirtir nasat a ţul hle mai, vawikhat pawh tih chhin loh a him ber.

•••••••••••••••
HEROIN (No. 4)Heroin hi a khawlai hming atan number an pe ve a, 1aţanga 4 thlengin; No. 4 hi a quality ţha ber chi a ni âwm e. Tun laiin Mizoramah a hluar thar hle mai a, an man thu chanchinthar aţangin kan hre chamchi bawk a; manchhuah loh a tam tih pawh a chiang reng mai. Damdawi in casualty-ah pawh No. 4 overdose hmuh tur an awm fo mai.

Heroin hi opium aţanga siam chhuah a ni a. Khawvela opium chîn tamna ram, Afghanistan, Myanmar, Pakistan, India leh Thailand ten min hual vel a, Mizoram hi a kalkawng pui ber pakhat niin a lang.

Spasmo proxyvon hi opium aţanga siamchhuah chu ni lo mah se, synthetic opium a ni a, opium ang deuhin a thawk ve a; pumpui, ril leh kawchhung lam nachhawkna ţha tak mai a ni a. Ei tura siam niin inchiu nana siam a ni lo va. Mahse, inchiu nan an hman avangin ţhalai tam takin an thih phah a, tam tak an piansual phah bawk a. Spasmo proxyvon a inchiu nasa tawh ho chu an thisen zâm a chhiat tawh avangin, lo dam lovin drip khai ngai leh thisen zâm a damdawi chiu luh ngaia an awmin a theih tawh ţhin loh va; buaithlak tak a ni.

Poppy hnâi aţangin crude opium an siam chhuak a, crude opium aţangin Morphine an siamchhuak leh a;Morphine chu thlifim lehin Heroin a lo chhuak ta a. Heroin fir hi a phut var niin eiin a khâ a. A chiu chi, hnim chi, zûk chi leh ei chite a awm a.

Opium leh opium aţanga siam ruihhlote hian thluak hnahthawh tihniamin a timuang a, nâ a chhawk a, mut a tichhuak bawk a. Heroin ruih hian vun a lum sa deuh ham ham a, nuam tihna leh hlim êm êmna lem (euphoria) a awm bawk a. Thâwk a muanga, mitnaute a lo tê (pinpoint pupils) a, luak a chhuak thei bawk a. Ruih zin poh leh a nawmna ngai anga nuam ti a rui turin dose tihsân zel a ngai ţhin a.

Heroin pawlh dal nan chini, bawnghnute powder leh quinine thlengin an hmang ţhin a. Pawlh dal a nih hian a thawh dân a danglam theih bakah dose hriat a tihar a, overdose a hlauhawm bik a. Heroin overdose-ah chuan thâwk a muangin a zâwi a, BP a hniam a. Tihrawl tawm vak vak, kaih leh nikhawhriatlohna te a awm thei bawk a, thihna hial pawh a thlen thei a ni.
Heroin ngaiin a thlah chuan darkar enge maw zat hnuah awm hle hle theihlohna, heroin ruih châkna nasa tak, tihrawl leh ruh nâ, muthilh theihlohna, kawţhalo, thlanfim a bual leh vawt tihna a awm ţhin a.

Opium leh opium aţanga siam overdose-ah hian naloxone hman ţhin a ni a. Naloxone hian opium leh heroin hnahthawh a tireh a, minute rei vak lovah thâwk pawh a pangai leh mai thei a. A ţul dan a zirin drip khai leh damdawi dang pek a ni bawk ţhin a.
Opium, heroin, khuh damdawi (codeine telna) leh proxyvon thlengin, a ngawlvei tawh sim duhte tan District tinah Opioid Substitution Treatment (OST) Clinic a awm a, a mamawh tan pan theih reng a ni a.A enkawlna damdawite hi ruih theih leh a ngawl vei theih a nih tho avangin uluk tak leh fimkhur taka pêkţhin a ni.

~ Lk. Sanga ~GILEAD THING HNÂI
315 Like

Alinordani
By dealing together, two of you can address problems of self-esteem and mutual trust. Core maca in the supplier energetix is an herb that tests quite well for many males.
473 Like


Comment Box
Your Name:

Your Text here:

Color


VidMate
Download Android App for Free
9Apps  UC Browser  New Apps  more